TACLOBAN CITY – Gin-aaghat han Department of Education (DEPED) an mga kag-anak nga pabakunahan na an ira mga anak kontra COVID-19 san-o pa man magtikang an school year 2022-2023 yana nga maabot nga Agosto 22.
Sumala kan Abner Aclao, information officer han Eastern Samar DEPED Division, ha pagkayana in gutiay pala an percentage o coverage han vaccination ha mga kabataan o mga estudyante ha ira rehiyon.
Tungod hini, gin aaghat nira an mga kag-anak nga paturukan hin COVID-19 vaccines an ira mga anak agud nga magkaada hin proteksyon ala kontra ha virus.
Ginklaro naman hini nga dire mandatory an pagpapabakuna ha mga kabataan pero mas makakaupay ini para ha ira pag eskwela yana nga ginpapatuman na an limited face to face classes ngan ha pag abot han Nobyembre 2 an transition naman ha full implementation han in-person classes.
