TACLOBAN CITY– Padayon nga nakikipagsumpayan an Department of Education Eastern Visayas, ha pamilya han magturotdo ngan sugadman ha mga kapulisan kasumpay han natabo nga panmusil ha sulod han campus hiton Tanauan School of Craftsmanship and Home Industries.
Sumala kan Jasmine Francisco Calzita, Information Officer han DepEd Eastern Visayas, dayon hira nagpatuman hin Psychological First Aid (PFA) ha mga nakakita han insidente, sugad hiton mga estudyante magin ha mga magturotdo.
Dugang pa ni Calzita, dayon gihapon nga nagpatuman hin suspension of classes an nasabi nga eskwlehan, agud nga matagan hin panahon an ginhimo nga psychosocial recovery ha mga kabataan.
Ginpaangbit pa hine, nga ginpadayon naman an pag-aram han mga estudyante ha ira mga panimalay pinaagi hiton alternative delivery mode.
Ha pagkayana, nagmando an DepEd Eastern Visayas, ha nasabi nga eskwelahan nga padayon ig-monitor an kabutang han magturotdo nga biktima, magin an pagpatuman hin mahugot nga seguridad ha sulod han school premisses ha tanan nga mga pribado ngan pampubliko nga eskwelahan ha bug-os nga rehiyon.
