TACLOBAN CITY – Mahugot an pakipagsumpayan han pagkayana han Department of Agriculture (DA) Regional Office 8 ha lokal nga pangobyernuhan han Abuyog, Leyte sugadman ha iba pa nga mga ahensya agud nga masiguro nga dire magsasarang an African Swine Fever (ASF) nga una nga nadetect ha mao nga bungto han naglabay nga semana.
Sumala kan Francis Rosaroso, tagapagyakan han DA Region 8, ha pagkayana in napinalisa na an ASF Action plan ha bug-os nga rehiyon kun diin mahugot na an ginpapatuman nga disease control measures ha ground zero han ASF cases ha Abuyog, Leyte partikular na ha Barangay Can-aporong.
Nagdudumara na gihapon hin tulo nga local veterinary quarantine checkpoints ha boundaries han mao nga bungto nga ginpapangunahan han Bureau of Animal Industry- Veterinary Quarantine Station Region 8 (BAI-VQS), Philippine National Police (PNP), Provincial Agriculture ngan Veterinary Office han Leyte ngan Abuyog LGU.Yana nga adlaw in nakatalaan naman nga bisitahon han DA 8 an mga bungto han Javier, MacArthur ngan La Paz agud nga masiguro nga dire makalusot o magsarang an ASF ha iba nga mga bungto.
