TACLOBAN CITY – Nanginginahanglan pa an mga otoridad hin usa kasemana san-o nga maipagawas an resulta han crime laboratory tests nga ginbuhat agud nga masolbar an kaso bahin han pagpusil-patay han usa nga pulis ha Cong. Mate Avenue Tacloban City.
Sumala kan Pol. Capt. Marjorie Manuta, tagapagyakan han Tacloban City Police Office (TCPO), ha pagkayana in padayon pa an ginbubuhat nga imbestigasyon han mga kapulisan kun diin usa ha mga ginkikita nga anggulo han insidente in may paghisumpay ha trabaho han mao nga pulis.
Dugang pa hini nga ginpapamulat pa ha pagkayana an bullet trajectory ngan autopsy report ha mao nga biktima agud nga matagan hin kasayuran an mao nga panhitabo.
Mababaruan nga dead on the spot an mao nga biktima nga hi P/CMS Renato Singcol, residente han Ormoc City ngan presente nga nakadestino ha Basey, Samar mahuman nga pagpamusilon han waray pa kakilal-e nga mga suspek samtang tisakay ini ha iya sarakyan.
