Nanawagan an pira nga senador ha gobyerno ngan ha Philippine Tennis Association nga tagan hin bug-os nga suporta an Filipino tennis star nga hi Alex Eala mahuman hini pili-on nga magin representante han Pilipinas ha 2026 Asian Games ha Nagoya, Japan imbes nga magmulay ha mandatoryo nga WTA 1000 China Open.
Ha manifestation nira Sen. Erwin Tulfo ngan Sen. Bong Go ha sesyon han Senado, gin-aghat ni Tulfo an Philippine Sports Commission, Philippine Olympic Committee ngan iba pa nga ahensya nga magbiling hin legal nga pamaagi agud buligan hi Eala kun igpasaka ha iya an nahipatik nga $10,000 nga penalidad mahitungod ha dire pagmulay hini ha torneo ha Beijing nga nagkadurungan ha iskedyul han Asian games.
Gintagan-duon ni Tulfo nga dire dapat igbutang an atleta ha sitwasyon nga kinahanglan hini pumili ha butnga han iya nasud ngan propesyon.
Humangyo naman hi Go, nga amo an tagmangulo han Senate Committee on Sports, ha pangobyernuhan han WTA nga igkonsidera an sitwasyon ngan tagan hin exemption hi Eala ha bisan ano nga multa o sirot mahitungod nga dire dapat ginsisirotan an usa nga atleta nga nagdesisyon nga magsirbe ha iya nasud.
