Ginsuspinde han Department of Agriculture an pag-export han presko nga ube o purple yam ha iba nga nasud agud masigurado anay an insakto nga suplay han planting materials ngan mapakusog an lokal nga produksyon.
Sumala ha DA, ginpatuman han Bureau of Plant Industry an suspensyon dida han Agosto nga sakop an presko nga ube ngan planting materials.
Ginmalatumat ni Agriculture Sec. Francisco Tiu Laurel Jr., nga dako pa an kakulangan han nasud ha planting materials ngan karuyag gihapon nira nga malikayan maipagawas an mga Philippine ube variety nga posible padamo-on ngan gamiton han iba nga nasud agud makig-kompetensiya ha Pilipinas.
Kadungan hini, padayon naman nga nahitaas an demand ha ube ngan mga produkto sugad han powder, halaya, jam ngan paste ha Canada, Middle East ngan pira nga parte han Asya.
