TACLOBAN CITY – Tampok ha programa nga Kakayahan para sa Kabuhayan, Kabuhayan para sa Kinabukasan han Bureau of Jail Management and Penology (BJMP) an mga produkto nga himo han mga Persons Deprived of Liberty (PDLs).
Sumala kan Tacloban City Jail Female Dormitory Acting Jail Warden, SJO4 Judith Balanay, ha nasabi nga programa in ira ginpaparayaw an “best product” nga himo han ira mga PDLs.
Tuig-2023 han magtikang an ira nga PDLs ha paghimo han ira mga produkto kun diin may-ada nagtutdo ha ira agud mahibaro ha pagluto o panhimo han ira produkto.
Dugang pa hini, an recipe han ira ginhimo nga brownies nga gin feature in nakita la han ira PDL ha karton han gatas nga iya naman ginsubad ngan ha yana in ginpadayon niya paghimo kumo iya produkto.
Samtang, personal naman nga gastos han mga PDLs an gingagamit ha pagpalit han mga panakot nga ira kinahanglan kun diin ginpapa-alayon nala ini pagpalit ha mga tawuhan han pasilidad o ha pamilya han PDLs. Sugadman man an kita o halin han ira produkto in nahingangadto gihapon han PDL.
An nasabi nga programa in kumo kaparte han Made in the Philippines Week, kun diin padayon nga gintatagan hin importansya an mga programa nga mayda panuyo nga pag-upayon pa an hibaro, pagigin creative, ngan kapas nga kumita han usa nga PDL.
Kun diin, an kada produkto nga ira ginhihimo in dire la bunga han ira mga kamot, kundi simbolo gihapon han pagbabag-o, paningkamot, ngan paglaum nga makagtikang utro.
