KANANGA, LEYTE – Usa nga istudyante han Grade 9 ha usa nga iskuylahan ha Kananga, Leyte an nanarhog nga magdadara hin pusil ha ira iskuylahan.
Sumala kan Kananga Municipal Police Station Chief of Police, PMaj. Darwin Dalde, gab-i na hira nahibaro han insidente mahitungod nga tumawag ha ira an School Principal han iskuylahan kasumpay han nasabi nga panarhog, kun diin gab-i na gihapon ini nahibaro rason han late nga pagreport hini.
Ha pamakiana ha kapulisan ha adviser han istudyante, daw an rason nga waray hiya magsumat dayun in mahitungod nga nakaistorya na niya an bata nga ginkilala kan alyas Yanyan.
Sumala han magturutdo, nag iiru-intrimis daw an bata ngan mga kaklase hini kun diin dida han pagbulsa haiya han iya kaklase in dumulo ini ngan nakagbul-iw han nasabi nga pulong.
Mahuman nga makarawat an impormasyon tikang ha maestra in ginkadto dayun han kapulisan an balay han bata kun diin gin pahibaro an mga kag-anak hini ha nagin batasan han ira anak. Nag-amin naman an bata nga nagbul-iw hiya han nasabi nga pahayag pero daw intrimis la ini niya ngan sumala ha kag-anak han bata in waray man gihapon hira pusil nga dadad-on han bata.
Nagpahimatngon naman an kapulisan ha mga istudyante nga dire himuon nga intrimis an sugad nga mga pahayag mahitungod nga nakakaghatag ini hin alarm ha kumunidad.
