CAPOOCAN, LEYTE – Usa nga truck an nadisgrasya ha kahilab-an han Brgy. Lemon, Capoocan, Leyte mahuman nga mawarayan hin kontrol an drayber hini dida han nakalabay nga adlaw.
Ginkilala an driver kan alyas Arthur, 47-anyos, ngan residente han Brgy. Agusting, Dulag, Leyte, samtang an helper naman hini in hi alyas Joseph, 26-anyos, ngan residente han Brgy. Buenavista, Alangalang, Leyte.
Sumala kan Capoocan Municipal Police Station Officer-in-Charge, PMaj. Joselito Mislos, mayda kargada nga mga container nga may sulod nga aciete o engine oil an nasabi nga truck.
Nagawas ha imbestigasyon nga tikang ha Tacloban City ngan tipakadto unta ha Ormoc City an nasabi nga sarakyan han madisgrasya ini ha nasabi nga lugar kun diin dida han tipaglugsong nga parte in nawarayan hin preno an drayber nga nagresulta han kawarayi hin kontrol hini ha sarakyan rason naman nga nabaliktad ini ngan nag-inawas an sakay hini nga aciete.
Nag-request naman hin bulig tikang ha Bureau of Fire Protection han Capoocan an ira istasyon agud magbalunas hin tubig ha lugar nga nabutangan han aciete agud malikayan an iba pa nga aksidente.
Sugadman, naghangyo gihapon ini hin heavy equipment tikang ha Engineering Office han lugar agud maipaligid an sarakyan mahitungod nga nakakaulang ini ha karsada.
Samtang, utro naman nga nagbalunas an BFP ha nasabi nga lugar mahitungod nga utro umawas an karga nga aciete hini.
