ALMERIA, BILIRAN – Duha nga istudyante han usa nga iskuylahan ha Almeria, Biliran an nakuhaan hin calibre .38 nga revolver ha gawas han ira iskuylahan.
Nahibaruan nga an mga istudyante in nag-eedad hin 10 ngan 11-anyos ngan parehas Grade-6 pupil ha Pulang Bato Elementary School.
Sumala kan Almeria Municipal Police Station Chief of Police, PCapt. Mar Manuel Doyola, nakuha an armas ha duha nga istudyante ha gawas han iskuylahan kun diin gintatago ini han duha nga bata ha usa nga lugar ugsa hira sumulod ha iskuylahan.
Basar ha imbestigasyon, mayda istudyante nga nakakita han nasabi nga pusil an nagsumat ha ira maestra kasumpay hini, kun diin iginpapanhambog daw ini han duha nga kabataan ha ira mga classmates nga may-ada hira pusil.
Dayon nga iginpatawag han maestra an duha nga bata agud klaruhon ngan siguraduhon an impormasyon, kun diin nakigkooperar naman an duha ngan gin surender an armas ha ira maestra.
Nahituman naman nga ha kaparehas nga adlaw in nagdudumara hin school visitation an mga kapulisan sanglit gin turnover gihapon an armas ha mga otoridad.
Nagawas gihapon ha imbestigasyon nga waray bala an nasabi nga pusil. Sumala pa kan Doyola, waray gihapon kaaway an duha nga kabata ngan gindadara la ini nga pusil agud igpanhambog ha ira mga kasangkayan ngan classmates.
Ha pagkayana, padayon pa nga gin iimbestigahan han mga otoridad kun tikang diin o hin-o an nagtatag-iya han pusil. Mayda naman na lead an kapulisan pero ginbeberipika pa an kamatuoran hini. Sugadman, gin-turnover gihapon ha Municipal Social Welfare and Development an duha nga kabataan nga dabi.
