TACLOBAN CITY – Gin malatumat ni Abucay Police Station 2 Station Commander, PMaj. Shenna Layog nga ira anay gin uuna ha pagdumara hin active shooting drills ha mga junior ngan senior high school nga mga iskuylahan ha syudad han Tacloban.
Dugang pa hini, diri karuyag sidngon hini nga natagya hira ha mga elementary school pero kaurugan manggud han mga lugar nga nagkakamay-ada hin panarhog o kaparehas nga insidente in ha mga sekondarya nga lebel.
Ginpapakita naman ha nasabi nga drill an importansya han kaandaman dire la han mga istudyante, kundi pati na gihapon han mga magturutdo ngan iba pa nga empleyado han iskuylahan.
Gintututdo gihapon ha drill an mga angay buhaton ha oras nga may-ada presensya hin active shooter sugad han pagsarado han mga posible nga sudlan han active shooter, pagbarikada han purtahan kun dire na makagawas han klasrum, ngan pagtawag hin bulig ha mga emergency number sugad han 911.
Samtang, ugsa mag-organisa han active shooting drills in nagdumara anay hin symposium an mga otoridad ha mga iskuylahan kun diin gin-una pag-tutdo ha mga magturutdo ugsa liwat an kabataan.
Pinaagi gihapon han gindudumara nga mga drills in ginpapakusog hini an koordinasyon dire la han kapulisan ha iskuylahan, kundi magin han iba pa nga ahensya han gobyerno, kun ano an mga angay buhaton ha sugad nga mga panhitabo.
