TACLOBAN CITY — Away ha tuna an ginkikita nga motibo han pamilya han usa nga US citizen nga ginpusil-patay han riding-in-tandem kakulop ha Barangay Bato, Biliran, Biliran.
Ginkilala an biktima nga hi Harvey Gene Abrams, usa nga retired US marine ngan residente han mao nga lugar.
Sumala ha misis han biktima nga hi Maria Aragon, nga pakadto unta hira ha Naval sakay han ira awto para sundoon an ira anak han tigda nala may usa nga single nga motorsiklo nga may sakay nga 2 ka lalaki an sumulpot ha wala nga parte han ira sarakyan nga gindadrivan han iya asawa ngan tigda nala ini nga ginpusil.
Dugang pa niya nga 2 la nga grupo an iya ginsususpetsahan nga responsable han pagpatay ha iya asawa ngan ini in may hitungod ha away ha tuna. Ugsa umano matabo an insidente nakakakarawat na hin mga death threats an iya asawa.
An pagpusila-patay kan Abrams an ikaduwa na nga kaso nga binuhatan hin riding in tandem ha probinsya han Biliran.
Manunumduman nga dida han nakalabay in usa nga Dutch national an nabiktima gihap han riding in tandem ha Sitio Dapdap, Barangay Agpangi, Naval samtang sakay ha awto pakadto gihap ha Naval.
