PALO, LEYTE – Padayon an imbestigasyon han Palo MPS mahuman an hit-and-run incident, diin gindeklara nga dead-on-the spot an usa nga babaye ha Brgy. San Joaquin, Palo, Leyte, han Mayo 14.
Ginkilala an biktima kan Ma. Lourdes Ogayan, inasaw-an, may anak, ngan residente han lugar.
Subay kan PCPT Fidel M. Triste Jr, Officer-In-Charge, Palo MPS, nahitabo an insidente han alas -7:40 han gab-i ha National Highway.
Nakakuha na hin CCTV footage an mga otoridad, pero dire klarado an plate number han van mahitungod nga masirom han mahitabo an insidente.
Waray gihapon direkta nga eyewitness hine.
Ha pagkayana, nagbubuhat na hin follow-up investigation an Palo PNP, lakip na an pagkuha hin kadugangan nga CCTV footage tikang ha mga terminal ngan establisimyento ha lugar agud matudlok an driver han van.
Subay ha pulisya, posible umatubang an suspek ha kaso nga reckless imprudence resulting in homicide, ngan babawion an driver’s license kun napamatud-an nga nagkasala.
Samtang, nanawagan naman hin hustisya an pamilya han biktima ngan gin-aghat an driver han van nga sumuko ngan panagutan an insidente. #
