Nagpatuman hin mas mahurohugot nga security measures an Senado kasunod han nakatalaan nga deadline ha paghahaon ni Vice President Sara Duterte han iya kabatonan ha Articles of Impeachment.
Subay ha abiso, kutob alas-7 hiton gabi yana nga Hunyo 1 la puydi magsumiter hin baton an Bise Presidente, personal man, pinaagi hin abogado, o ha electronic mail.
Manunumduman nga pormal na nga naidurayhag kan Duterte an summons dida han nakalabay nga Mayo 20, duha ka adlaw mahuman mag-convene an Senado kumo impeachment court.
Ginlqlauman nga magtitikang an impeachment trial ha Hulyo 6 kundiin, maatubang hi Duterte ha mga reklamo nga culpable violation of the Constitution, graft and corruption, ngan betrayal of public trust.
Mahitungod ha ginlalauman nga pagdamo hiton ihap hiton media sugad man mga tagasuporta ngan kritiko hiton Bise Presidente, naglatag an Office of the Senate Secretary hin mga rules para ha coverage hiton media sugad man nag tudlok hin mga lugar kundiin puydi magbuhat hin press briefing an kampo ni Duterte.
Subay hiton Senado, panuyuan han mao nga pitad in agud masigurado an maayos, talwas ngan episyente nga proseso hin paghahaon hin kabatunan samtang naghahatag hin sadang nga access an media ha mga nahihinabo.
Nakikig-koordinar naman an National Capital Region Police Office (NCRPO) ha Office of the Sergeant-at-Arms agud siguraduhon an kaayusan ha palibot han Senado.
Smatang, ha ilarom han Rules of Procedure on Impeachment Trial, magkakamay-ada naman hin lima ka adlaw an prosecution panel agud magsumiter hin ira reply mahuman makarawat an magiginkabatonan hiton Bise Presidente.
