Nagpagawas hin month-ahead forecast an Bangko Sentral ng Pilipinas (BSP) nga nagmamalatumat nga posible sumulod ha butnga han 7.1% kutob 7.9% an inflation para ha bulan han Mayo tuig 2026, mas hitaas kuntra ha target nga 2%–4%.
An paghitaas han presyo han bugas, utanon, ngan karne, pati na an padayon nga paghinay han piso kuntra dolyar in an pangunahon nga nagduduso hin presyur ha presyo.
Sugad man an gutiay nga nakaiban ha inflation an mga rollback ha presyo han lana, mas hamubo nga presyo hin isda, ngan an gutiay nga paghimubo ha sukot han kuryente.
Dida han nakalabay nga bulan han Abril 2026, naitala nga an inflation in umabot ha 7.2%, pinakahitaas ha sakob hin tulo ka-tuig, durot han hitaas nga presyo han pagkaon ngan utilities.
Mahitungod hini, nagpatuman an BSP hin 25 basis points rate hike dida han Abril agud pugngan an mas hiluag nga epekto han inflation ngan mapabilin an pagtapod ha merkado.
Subay kan BSP Governor Eli Remolona, Jr., gin e-estudyohan han Monetary Board an posibilidad han off-cycle rate hike ugsa pa man umabot an Hunyo 18 nga meeting, kumo kabatunan ha padayon nga hulga han gyera ha Middle East nga nagpahitaas han presyo han lana ngan iba pa nga papliton.
Ha kaluyo hini nga mga pitad, nagpapabilin nga ayat an stagflation risks kundiin, nahinay an pagribhong han ekonomiya samtang nahitaas an an presyo han mga pangunahon nga papliton.
Ha pagkayana in ginpapadig-on han BSP an mao nga polisiya agud maibalik an inflation ha target range, samtang ginlalauman an suporta tikang ha fiscal policy han gobyerno para ha mga sektor nga pinakaapektado.
