TACLOBAN CITY – Maabot ha 383 nga mga empleyado han Schistosomiasis Hospital an naturukan na han first dose han Sinovac vaccine ha tulo kaadlaw nga vaccination rollout nga gindumara ha mao nga ospital.
Sumala kan Dr. Janice Capoquian, Infection Control Committee Chairman han Schistosomiasis Hospital, ha inisyal nga 420 nga ihap han mga eligible nga magpabakuna han Sinovac in mayda pipira nga nagbackout ngan waray magpadayon pagpabakun.
Maabot naman ha 165 nga mga empleyado han mao nga ospital an nagpapamulat nga mabakunahan han AstraZeneca vaccine.
Nakatalaan gihapon nga magdumara utro hin orientation bahin han bakuna an Schistosomiasis hospital agud nga maaghat an mga empleyado hini nga waray pa magsignify pagpabakuna.
Nahibaruan nga kasagaran ha mga bumaribad pagpabakuna han Sinovac an mga non medical employees o an ada ha mga opisina ngan iba nga departamento han ospital.
Ha 383 nga nagpabakuna na han Sinovac in maabot ha 14 nga mga empleyado an nakaabat hin paghitaas hin blood pressure pero dayon naman an mga ini nakarecover makalabay an pira kaminutos.
Mahuman an 28 diyas in nakatalaan naman nga ighatag an second dose para ha mga naturukan han Sinovac vaccine.
