NATIONAL NEWS- Ginhaon han Office of Public Counsel for Victims (OPCV) han International Criminal Court (ICC) an rekomendasyon hiton duha nga eksperto ha neuropsychology nga magbubug-os hin bag-o nga panel nga manginginano ha mental health ni anay Pangulong Rodrigo Duterte agud nga matudlok kun angay paba ine umatubang ha hearing hiton iya mga kaso nga ginkaka-atubang.
Ginmalatumat ni Paolina Massidda, Principal Counsel han OPCV, an duha nga ginrekomenda nga manginginano kan Duterte in mayda sadang nga credentials ngan eksperyensyado.
Subay pa ha OPCV, ginpili nira an mga eksperto subay ha ira kwalipikasyon ngan kapasidad, kalakip an pagigin maaram ha ingles.
Manunumduman nga an ICC in anay nagtudlok hin 3 nga miyembro han panel nga ginbubug-os han usa nga forensic psychiatrist, neuropsychologist, ngan eksperto ha geriatric ngan behavioral neurology.
Sugadman , ginhangyo han kampo ni Duterte nga tangalon an usa ha mga eksperto matungod ha kakulangan hine ha eksperyensya ngan posible kawaray hiton impartiality .
