SOGOD, SOUTHERN LEYTE – Patay an usa nga 51-anyos nga tatay ha Brgy. Dagsa, Sogod, Southern Leyte mahuman nga panibagson han iya la gihapon pursuso nga anak.
Ginkilala an biktima kan alyas Alan, samtang an suspek naman in an iya anak nga hi alyas Kim, 27-anyos an pangidaron, ngan residente han Brgy. Dagsa, Sogod, Southern Leyte.
Sumala kan Sogod Municipal Police Station Chief of Police, PLt. Col. Dexter Edillo, usa nga tawag an ira nakarawat tikang ha Kapitana han nasabi nga barangay kasumpay han insidente.
Dayun naman nga ginrespondehan an panhitabo kun diin pag-abot han kapulisan ha lugar in nakit-an nga nakabulagta na an biktima.
Gindara naman ine dayun ha pinakaharani nga hospital para han kaangayan nga pagtambal pero gindeklara ine nga dead-on-arrival han nag-atender nga doktor.
Subay han imbestigasyon, nagribok an suspek ha sulod han ira panimalay ngan nanruba hin mga gamit.
Kun diin ha prubar nga pakalmahon an iya anak in sumulod an tatay ha ira panimalay pero dida han pagdaop hine in tigda la ine nga pamalbag hin flat steel bar makadamo kabeses han iya anak.
Nag-angkon naman ine hin kasamdan ha may kamot hine ngan ha may ulo.
Waray naman na mahiabti an suspek ha crime scene mahitungod nga dayun ine umiskapo mahuman an krimen sanglit nagdumara an mga kapulisan hin hot pursuit operation.
Ha pakigbinuligay han mga residente ha nasabi nga barangay in malinampuson nga naaresto an suspek ngan ginpasakan na hin kaso nga parricide.
