Usa nga insidente han pagkalumos an nahipatik ha usa nga beach resort ha San Jose, Tacloban City dida han kulop han mga nakalabay nga adlaw.
Narekober han rumesponde nga mga otoridad an lawas han usa nga lalaki nga ginkikilala kan alyas “Wyn”, 33 anyos an pangidaron, empleyado han usa pribado nga kumpanya ngan residente han North Hill, Tacloban City.
Basar han impormasyon, nga nangarigo hin dagat an biktima kaupod an umangkon hini kun diin, nahipatik nga pumakadto an mga ini ha halarum nga parte han dagat.
Dida han tipabalik na ha pangpang an umangkon han biktima, in napansin nala niya nga nawawara na an tiyo hini.
Natad-an naman an lawas han biktima nga naglulutaw-lutaw ha kahirani nga beach resort han usa liwat nga indibidwal, nga kun diin dayon naman ini nga tumawag hin bulig.
Ginprubaran pa nga ig-salbar an biktima han mga rumesponde nga otoridad ngan gindara ha kahirani nga ospital, pero gindeklara na nga dead on arrival an biktima han attending physician hini.
Basar naman han resulta han autopsy, waray nakita nga under influence hin makahurubog nga irimnon an biktima ngan sugad man senyales hiton foul play.
Samtang, nagpahimatngun naman an mga otoridad ha publiko, labi na iton mga mapadagat ngan mangangarigo ha mga kariguan, nga maghirot ngan likayi iton pumakadto ha mga haglarom nga parte agud malikayan an sugad nga insidente.
