TACLOBAN CITY – Nagpahimatngon an pira nga negosyante ngan economic leaders nga nagdudurot hin ayat ha ekonomiya an rotational brownout, labi na ha sektor han negosyo ngan konsyumer.
Subay kan Philippine Chamber of Commerce and Industry (PCCI) Regional Governor, Eugene Tan, dako nga ayat para ha mga negosyo an pagkawara han kuryente mahitungod nga kadaras-an han mga operasyon han mga establisimyento in naka-depende ha elektrisidad.
Mahitungod hine, napipiritan an mga negosyo nga gumamit hin generator agud magpadayon an ira operasyon.
Gin-esplikar gihapon hine nga an padayon nga yellow ngan red alert status ha power supply in usa nga indikasyon nga manipis na an reserve energy ha nasud.
Kun ada ha red alert status, nangangaruyag sidngon nga haros sagad na an kalidad han mga planta han kuryente rason nga nagkakamay-ada hin rotational brownout.
Dugang pa, maiha na dapat nagkamay-ada hine kadugangan nga planta hin kuryente ha nasud agud malikayan an sugad nga klase hin sitwasyon.
Nagin ayat gihapon an moratorium ha coal power plants ngan an mahinay nga proseso han pagtutukod hin mga bag-o nga planta mahitungod ha damo nga requirements ngan regulasyon.
Ha sulod han pira kadekada, nagin dependent an nasud ha coal ngan Malampaya gas field kumo pangunahon nga pinagkukuhaan hin enerhiya.
Pero samtang naiibanan an reserba han Malampaya, kinahanglan na magbiling hin alternatibo nga mapagkukuhaan hin iba nga enerhiya.
Subay pa kan Tan, apektado gihapon an pagkawara han pagtapod han mga foreign investors, mahitungod nga usa ha mga pangunahon nga ginkokonsiderar han mga ine an stability han basic utilities sugad han kuryente ngan tubig antis magtukod hin negosyo ha usa nga lugar.
Posible pa nga umubos an produksyon ngan income han mga negosyo, nga magdudurot han paghitaas han inflation ngan paghinay han ekonomiya, labi na nga hamubo an economic performance han Eastern Visayas kumpara ha iba nga rehiyon han 2025.
Gintagan-duon pa hine an importansiya han tuhay nga pagpili han mga electric cooperative ha ira power supplies agud masigurado an sakto ngan malalauman nga kuryente.
Samtang, padayon naman nga ginduduso han gobyernop an renewable energy agud masolusyonan an nagtitikahitaas nga demand han kuryente ha nasud.
