TACLOBAN CITY – Mahugot nga babantayan han Department of Agriculture region 8, an pampresyuhan han mga produkto matungod ha epekto han rehabelitasyon han San Juanico Bridge.
Usa mangud nga ginpro-problema yana han mga taga Sinirangan Bisayas, an nagtitikahitaas nga presyo han mga papliton.
Sumala kan Francisco Rosaroso – Division Chief Department of Agriculture region 8, dire la presyo an ira babantayan, kalakip na an seguridad ngan kalidad han mga agriculture product’s agud nga malikayan an mga sakit nga posible igdurot tikang ha mga igsusulod nga produkto ha Leyte ngan Samar.
Subay naman ha survey han Philippine Statistics Authority, humamubo an inflation rate ha region 8 nga mayda 0.4% han nakalabay nga Mayo kumpara hadton Abril nga 0.6%, kun diin an food and non-alcoholic beverages an dako an ginhamubo ha pagkayana.
Dugang pa hine, kun susumahon ha bug-os nga Pilipinas ada ha ika-5 nga pwesto an Eastern Visayas ha may pinakahamubo hiton inflation rate
Pero an nakakapausa in higtaas la gihapon an presyo han mga produkto ha rehiyon.
Sanglit ha pagkayana, magdudumara hin price monitoring an Department of Agriculture agud nga masigurado nga dire maabususar han mga supplier o middleman, ngan bisan an mga nagtitinda ha mga merkado.
