Pormal na nga nahuman ni Presidente Ferdinand Marcos Jr. an iya upat kaadlaw nga state visit ha Japan nga ginhulagway niya kumo “highly productive ngan constructive,” mahuman makuha an importante nga kasabutan ha ekonomiya, seguridad, ngan diplomasiya.
Ginmalatumat han Presidente nga mas ginparig-on han pagbisita an 70 katuig nga relasyon han Pilipinas ngan Japan.
Kaupod ha nagin tampok han biyahe an pagkikighampang ni Marcos kanda Emperor Naruhito ngan Empress Masako, sugadman kan Japanese Prime Minister Sanae Takaichi.
Nagkasabot gihapon an duha nga nasud nga pahitas-on an ira koneksyon tikadto ha Comprehensive Strategic Partnership.
Ginpahaluag gihapon han Pilipinas ngan Japan an kooperasyon ha depensa, enerhiya, artifical intelligence, trade, ngan maritime security.
Gin anunsyo gihapon an pagtitikang han negosasyon para ha General Security of Military Information Agreement o GSOMIA.
Samtang, umabot ha US$3.4 bilyon an investment pledges ngan business opportunities nga nakuha han Presidente tikang ha mga Japanese investors.
Ginlalauman naman nga maghihimo ini hin sobra 10,000 nga trabaho para ha mga Pilipino.
Nakigkita gihapon hi Marcos ha Filipino community ha Japan ngan ginsigurado nga magpapabilin nga prayoridad han gobyerno an kapakanan han mga overseas Filipino.
