TACLOBAN CITY – Padayon nga ginpapamulat han regional ngan provincial offices han Department of Trade and Industry (DTI) an opisyal nga memorandum circular nga igpapagawas han ira head office para han mga aludayday bahin han nauuso nga online barter ha magkadirudilain nga lugar ha nasud.
Una hini, ginkakabaraka han pira nga mga katawhan nga nakikipagbarter han ira personal nga mga gamit an naging pahayag han DTI nga daw illegal an online barter.
Sumala kan Siali Cosares, Mediation Officer DTI Leyte, an gintutudlok nga illegal han DTI an online barter in the course of regular business o adton mga nakikipagbarter para makaganansya ngan magkaada hin profit.
Ginklaro naman hini nga an nauuso nga online barter ha magkadirudilain nga lugar kun diin ginbabarter an personal nga gamit han usa katawo in dire na kinahanglan pa nga igparegister o buhisan.
