Diri maubos ha 4 ka tawo an namatay mahuman magbunggoay an duha nga tren ha syudad han Bekasi, harani ha sentro han Jakarta, dida han Lunes han gabi.
Nahinabo an aksidente ha Bekasi rail station kundiin, nagbunggay an usa nga commuter line train ngan usa nga long-distance train.
Gin kumpirma han railway operator han Indonesia, nga upat an kumpirmado nga namatay samtang 38 nga iba pa an gin dara ha kahirani nga ospital.
Samtang, nagpahinumdom hi Deputy Speaker Sufmi Dasco Ahmad nga may-ada posibilidad nga humitaas pa an ihap han mga biktima mahitungod han nagpapadayon nga rescue operations.
Subay ha impormasyon, gin babana-bana unom ngada ha pito ka tawo an naiipit ha sakob han mga bagon, rason kun kay ano padayon an pag utod han rescue team ha mga puthaw nga parte han tren agud maitalwas an iba pa nga biktima.
Kasumpay hini, nagbubuhat na an Jakarta Police hin imbestigasyon agud matudlok an rason han bunggoay.
Presente gihapon ha mao nga lugar han insidente an diri maubos ha 20 nga mga ambulansya, samtang nabulig an mga rescuers tikang ha national disaster ngan rescue agencies ha pag ebakwit han mga pasahero.
Gin lalauman nga magpapagawas pa hin kadugangan nga detalye an mga otoridad ha mga masunod nga oras kabahin han nahinabo nga insidente.
