TACLOBAN CITY – Ginpahayag ni Ormoc City Mayor Richard Gomez nga diri na aaruan hin negatibo nga RT PCR result an mga indibidwal nga masulod ha Ormoc City kun fully vaccinated na an mga ini kontra COVID-19.
Ini an ginkumpirma han alkalde ha usa nga interview kumo pagsunod liwat ha gin-issue nga guidelines han National Inter Agency Task Force for the Management of Infectious Disease (IATF MEID) nga nahatag hin katugutan ha mga domestic travelers nga sumakob ha mga syudad o munisipyo nga diri na kinahanglan nga magpresentar hin negatibo nga swab test result kon naturukan na an mga ini hin duha kadoses hin bakuna.
Sumala kan Gomez, ini nga pitad in magseserbi nga incentive para hadton mga nagpartisipar ha vaccination rollout ngan makakabulig gihapon ha pag aghat han mga tawo nga magpabakuna.
Kinahanglan la nga dad-on han indibidwal an ira vaccination card agud nga nga makasulod ha Ormoc City.
Igpapailarom naman ha orientation an mga bantay ha mga border control checkpoints agud masiguro nga authentic ngan diri makakalusot an may dara nga peke nga vaccination card.
Pero gintagan hin duon ni Gomez nga magpapabilin la gihapon an ira strikto nga border control checkpoints ngan kinahanglan la gihapon hin QR code an tanan nga masulod ha Ormoc City.
Para naman hadton diri pa kumpleto an bakuna o waray pa magpabakuna nga masulod ha Ormoc City pinaagi ha seaport o airport, kihanglan la gihapon magpresentar hin negatibo nga RT PCR test o saliva test result, 72 kaoras antis sumulod ha syudad.
Para naman ha magtitikang ha Camotes Island ha Cebu City, health certificate la an ira aaruon.
Para naman ha mga taga Sinirangan Bisayas kon diin waray RT PCR testing center ha ira lugar, aaruan hira negatibo nga saliva test result o di man ngani non reactive nga antigen test result, 72 hours san o sumulod ha syudad.
Kukuhaon naman hin QR code adton mga tigawas ha Ormoc City ngan sa sakob hin 20 diyas nga waray pa hira makabalik, kinahanglan na nira nga magpresentar hin negatibo nga RT PCR test result, negatibo nga saliva result o di man ngani, antigen test.
