Gin klaro han Department of Social Welfare and Development (DSWD) nga diri na nanginahanglan hin bisan ano nga sertipikasyon tikang ha Commission on Election (COMELEC) agud magin kuwalipikado an usa nga public utility vehicle (PUV) ha pagkuha han mga cash relief assistance.
Ini in kasunod han usa nga balita ha Cebu City nga gin aaruan hin certificate tikang ha COMELEC an usa nga ‘habal-habal’ driver agud makakuha hin ayuda.
Sumala kan DSWD spokesperson ngan assistant secretary Irene Dumlao, karuyag han ahensya nga mapadagmit an panhahatag hin cash assistance ha mga drivers rason kun kay ano diri na kinahanglan pa hin certificate tikang COMELEC.
Pagklari pa hini, an P5,000 nga cash assistance ha ilarom han Assistance to Individuals in Crisis Situations nga iginhahatag ha mga kuwalipikado nga PUV drivers in mahitungod han paghitaas han presyo han lana.
