Daog an Golden State Warriors (GSW) kontra ha Los Angeles Clippers ha pag-atubang han duha para ha Spot No. 9 ha Western Conference.
Mahitungod hini, aatubangon han Warriors an Phoenix Suns para ha Spot No. 8. An magdadaog ha duha an makakaabanse ha 2026 Playoffs ngan maatubang ha top NBA team nga Oklahoma City Thunders.
Ha nahitabo nga mulay ha Clippers, hinay-hinay nga nahabol han Warriors an 9-point deficit nga nakuha hini ha syahan nga kwarter, ha iskor nga 31-22.
Ha ikaduha nga kwarter in umubos ini hin usa ka-puntos ngan duha kapuntos naman an igin ubos ha paghuhuman han 3rd quarter, 89-83.
Ha kaluyo han 6-point deficit, gin pirit han Warriors nga dominahon an katapusan nga kwarter pinaagi han agresibo nga opensa ha pangunguna nira Stephen Curry ngan Brandin Podziemski. Ha pag-arangkada han GSW, nahimo hini nga ig ubos ha usa kapuntos an deficit, 114-115 duha kaminutos ugsa mahuman an mulay.
Ugsa mahuman an mulay, 50 minutos ugsa an mahuman an regulation, naitabla na han Warriors an score ha 117, ngan umangat ha 120-117 pinaagi han usa nga 3-pointer ni Stephen Curry.
Waray na makabawi pa an Clippers tikang hini, nga mas umangat pa ha 5 points an lead han GSW ha paghuhuman han mapaso nga mulay ha iskor nga 126-121.
Naghuman hi Curry nga mayda 35 points, kapot an positive 9 performance. Nahimo naman han Golden State bigman nga hi Kristaps Porzingis nga magbutang hin 20 points, ngan tag-lima nga rebounds ngan assists, kaupod an duha nga blocks,
Ha Clippers, nalimitahan la an batikan nga forward nga hi Kawhi Leonard ha 21 points ha kaluyo han pagmumulay niya hin 40 minutos.
