TACLOBAN CITY – Ginpahimatngonan han Department of Migrant Workers (DMW) Region 8 an mga nagplaplano nga magtrabaho ha gawas han nasud nga likayan nga mabiktima ha mga illegal recruiters.
Sumala kan DMW OIC-Regional Director Marlon Macallan durante han ginbuhat nga Kapihan sa Bagong Pilipinas han Philippine Information Agency 8, nga madagmit daw la nga masabtan an mga illegal recruiters tungod han ira mga ginbubuhat nga mga transaksyon.
Kinahanglanon daw nga siguraduhon anay nga lisensyado an mga ini ngan mayda gihapon job orders an recruitment agency nga dadaupan.
Mas maupay daw gihapon nga dumaop anay ha ira opisina agud nga masabtan kun legal ba an operasyon han recruitment agency, ngan sugad man gihapon nga likayan an mga travel agencies nga nag aaghat nga ipaagi ha ira ahensiya an pagtrabaho ha langyaw mahitungod nga ine in sigurado nga iligal.
Samtang, an mga recruitment naman nga ginbubuhat ha mga probinsya, in kinahanglanon liwat nga mayda igpapakita nga authority para hira in magbiling hin mga magtratrabaho ha langyaw.
Pagduon pa ni Macallan nga kun nagdududa ha usa nga recruitment agency, in dumaop ha mga awtoridad agud mahisabutan kun lehitimo ba an ira naman mga operasyon.
