TACLOBAN CITY –– Nagpatuman an probinsya han Northern Samar memorandum nga maghahatag hin katugutan nga mag work-from-home an pira nga mga empleyado ngan contractual workers ha bug-os nga probinsya.
![](https://img.bomboradyo.com/tacloban/2021/06/191144651_3024438047821142_3553391891787319074_n.jpg)
An mao nga kamanduhan in epektibo tikang han Hunyo 7 kutob Hulyo 7 yana tuig. Sumala kan John Allen Berbon, tagapagyakan han Northern Samar Provincial government, nga an mao nga memorandum in ginpalusad mismo ni Gov. Edwin Ongchuan para ha maabot 1000 nga mga empleyado nga apektado han COVID-19 pandemic.
Panuyo han mao nga kamanduhan in agud nga matagan nira hin iwag kun patiunan-o pa maproprotehiran an ira munisipalidad kontra ha COVID-19. An katugutan nga work-from-home in para hadton mga naka-assinged ha Office of the Vice Governor, provincial board, ngan sugadman ha tourism office. Para naman ha mga empleyado nga aada naka-assigned ha Governor’s Office, provincial health office, information, general services, ngan engineering offices, in kinahanglan naman nga magkamayda hin skeleton workforce arrangement.
Samtang para naman ha mga empleyado nga naka-assigned ha provincial offices of disaster risk reduction management, social welfare and development, provincial jail and sub-jails, and provincial and district hospitals, in padayon nga masulod ha trabaho ha regular hine nga mga work schedule. Mababaruan nga hapagkayana in mayda maabot ha 1,748 COVID-19 cases an mao nga probinsya.
Una na nga ginkumpirma han Department of Health (DOH) nga tikang ha bungto Catubig Northern Samar an duha nga kababayen-an nga nagpositibo han United Kingdom (UK) variant B.1.1.7. Naglalaom naman an mao nga opisyal nga makikipagkooperar an ngatanan agud nga dire na madugangan pa an paghinitaas han kaso han COVID-19 ha mao nga probinsya.