TACLOBAN CITY – Ginkilala han mga nangunguna nga sky travel advisory website an Kalanggaman Island nga usa ha siyam nga may pinakamaupay nga sandbar ha bug-os nga Pilipinas.
Makikita an isla nga gintawag nga “paraiso” ha Palompon, Leyte.
Gintagan gihapon hin pagkilala kumo “Most Tourism-Friendly Local Government Unit Award” an Mayor han Palompon nga Hi Mayor Ramon Oñate matungod na gihapon ha iya pagiging amay ngan pag mintinar han pase orden ha iya bungto nga “crown jewel” ha Northwestern leyte.
Nagpasalamat naman hi Mayor Oñate ha mga residente nan labi na ha mga parag-isda matungod ha ira waray wantas nga pagrespeto han ira kadagatan ngan pagmintinar an kalimyo dinhi.
Dugang pa dinhi, iya gihapon ginpasalamat an Department of tourism, Leyte Governor Dominic Petilla, Energy Seretary Carlos Jeriho Petilla ngan Leyte District Rep. Lucy Torres-Gomez matungod ha iya nakuha nga suporta ha pag-usad han turismo ha Palompon.
Kaupod han Kalanggamai Island ha siyan nga may pinakamaupay nga sandbar ha Pilipinas amo an Higatangan Island ha Biliran province ha Eastern Visayas, Manjuyod White Sandbar ha Negros Oriental, White Island ha Camiguin, Sumilon Island Sandbar ha Cebu, Manlawi Island ha Caramoan, Snake Island ha El Nido, Bulubadiangan Island ha Iloilo ngan Virgin Island ha Bohol.
