NATIONAL NEWS– Posible nga iglakip hi anay Spokesperson Atty. Harry Roque, ha watchlist han International Criminal Police Organization (Interpol) kun mag-isyu hin warrant of arrest an korte, ine in subay ha Bureau of Immigration (BI).
Pag-esplikar ni BI Spokesperson Dana Sandoval, samtang mayda detention order an Kamara kontra kan Roque, ginkikinahanglan hiton warrant of arrest tikang ha korte agud nga mahilakip ine ha watchlist han Interpol.
Dugang pa ni Sandoval ha kaluyo nga mayda ine immigration lookout bulletin kontra ka Roque, waray hold departure order nga ginpapagawas kontra ha iya.
An lookout bulletin in nagpapahibaro la nga kinahanglan bantayan an mga biyahi ni Roque, samtang an hold departure order naman in an korte la an pwede mag-isyu hine, kun diin nagbabawal ha usa nga tawo nga gumawas ha nasud nga waray katugutan tikang ha korte.
Mababaruan, nga an pag-atinder ni Roque ha The Hague, Netherlands in nagdurot hin kawurok partikular na nga mayda ine nakabinbin nga arrest warrant tikang ha Kamara nga kanit ha Philippine offshore gaming operators (POGOs).
