Posible maigawas na ha mas madagmit nga panahon an programa nga maghahatag hin insentibo ha lokal nga paghimo hin mga electric vehicle (EV), subay ha Department of Finance (DOF).
Subay ha DOF, naipresente na kan Presidente Ferdinand Marcos Jr. an EVIS o Electric Vehicle Incentive Strategy, pero padayon la gihapon nga gin aayad han Board of Investments (BOI) kaupod an iba pa nga ahensya han Fiscal Incentives Review Board (FIRB) an mga detalye han programa.
Labot ha DOF ngan Department of Trade and Industry (DTI), kaupod gihapon ha FIRB an Department of Budget and Management, Department of Economy, Planning and Development, ngan Office of the President.
Mas timprano na nga ginmalatumat ni Trade Undersecretary ngan BOI managing head Ceferino Rodolfo nga ginlalauman nga maipapagawas an executive order para ha EVIS ugsa an State of the Nation Address ni Bongbong Marcos ha Hulyo.
Subay ha gindumara nga konsultasyon han DTI, plano han gobyerno nga mag-alutaga hin P60 bilyon nga fiscal incentive package para ha EVIS. Abri ini para ha mga manufacturer han four-wheeled EV sugad han battery electric vehicles, hybrid electric vehicles, ngan plug-in hybrid electric vehicles.
Ha ilarom han panukala nga EVIS, upat nga kumpanya an pwede makatagamtam, ngan kada usa in makakarawat hin kutob P15 bilyon nga suporta tikang ha gobyerno kabalyo han ira pamumuhunan ha paghimo han EV ha nasud.
Dire sugad han anay programa han gobyerno nga CARS o Comprehensive Automotive Resurgence Strategy, waray gintudlok nga production target an EVIS para ha mga partisipante han kumpanya.
Mas dako gihapon an nakatalaan nga pondo ha EVIS kumpara ha P27 bilyon budget han CARS program.
