Usa nga kondisyon nga ginbabana-bana nakakaapekto ha sobra-kulang 170 milyon nga kababayen-an ha bug-os nga kalibutan ngan maiha na nga kilala kumo polycystic ovary syndrome (PCOS) in ginbalyuan an ngaran agud mapaupay an diagnosis ngan pagtambal, subay ha mga siyentista nga nag-anunsyo dida han Martes ha usa nga medical meeting.
Aan bag-o nga tawag hini in polyendocrine metabolic ovarian syndrome (PMOS), nga iginsalawad han usa nga pan kalibutan nga koalisyon han mga pasyente, doktor, ngan mga medical organizations. Ginpublisar gihapon an report ha The Lancet kadugangan han presentasyon ha European Congress of Endocrinology ha Prague.
Subay ha mga siyentista, an luma nga termino nga PCOS in kaurugan nga nagdudurot hin kalipong mahitungod nga iginsusumpay ini ha ovarian cysts, nga dire naman pirme makikita ha ngatanan han pasyente.
Dugang pa, panuyo han pagbabag-o han ngaran nga mas maipakita an hormonal ngan metabolic nga epekto han kondisyon ngan mapaupay an pag-intindin hini ha klinikal nga pantag.
Ginmalatumat ni Dr. Terhi Piltonen han University of Oulu ha Finland, lead author han pag-aram ha The Lancet, ha usa nga researcher letter nga ginpublisar ha JAMA Internal Medicine nga an sayop nga pagkakaintindi ha kondisyon in nagdurot hin pagkadelatar ha diagnosis ngan pagtambal.
Subay ha desisyon ha pagbabalyo hin ngaran ha sobra 14,000 nga baton ha survey tikang ha mga pasyente ngan health professional ha magkadiru-dilain nga nasud, pati na gihapon ha input han 56 akademiko, klinikal, ngan patient organization, ngan duha nga international workshops.
Kaupod ha sintomas han PMOS an dire regular o waray regla, infertility, komplikasyon ha pagbuburod, duro nga pagtubo hin buhok, acne, anxiety ngan depression, paghitaas han timbang, obesity, diabetes, insulin disturbances, ngan sakit ha kasing-kasing ngan ugat. Imbes nga cysts, komon nga mayda excess antral follicles ha obaryo an mga pasyente.
Bisan man kun waray pa tambal, pwede ma-manage an mga sintomas pinaagi han medisina, sakto nga pagkaon, ngan ehersisyo, subay ha Endocrine Society.
Ginlalauman nga pagdudumaraon an pagbalhin ha bag-o nga terminolohiya ha sulod han tulo katuig, kaupod an pag-update han clinical guidelines, training ng health workers, ngan disease classification.
