Natuod hi Rep. Joel Chua nga magpapadayon hin hapsay an impeachment trial ni Vice President Sara Duterte ha kaluyo han tigdaay nga pagbabag-o han liderato ha Senado, kun diin hi Sen. Alan Peter Cayetano an nahurar kumo bag-o nga Senate President mahuman matanggal hi Sen. Tito Sotto dida han Mayo 11, 2026.
Sumala kan Chua, natapod hiya nga hi Cayetano, kumo usa nga beterano nga abogado ngan anay Speaker han Kamara, in kikilal-on an iya konstitusyunal nga trabaho nga dayun mag-convene hin impeachment court ha oras nga makarawat an Articles of Impeachment tikang ha House of Representatives.
Manunumduman nga bumotos an Kamara hin 257-25-9, pabor ha impeachmet ni Duterte, ikaduha na tikang han lumingkod ini kumo Bise Presidente.
An mga kaso nga sulod ha Articles of Impeachment in ginkakalakipan han misuse han confidential funds, unexplained wealth, bribery, ngan death threats kontra ha mga opisyal han gobyerno.
Dugang pa ni Chua, madig-on an ebidensya kontra kan Duterte subay ha mga dokumento tikang ha SALN, Anti-Money Laundering Council (AMLC), Securities and Exchange Commission (SEC), ngan Commission on Audit (COA) nga nagpapakita hin dire tugma nga datos han iya karikuhan ngan mga bank transactions.
Ha kaluyo naman han pagkabaraka han pira nga an bag-o nga liderato han Senado in pwede magdurot hin pagkadelatar, iginduon ni Chua nga an Batakan Balaod mismo an nagtutudlok nga an Senado in kinahanglanmag-convene dayun kumo impeachment court, sanglit dire angay maapektaran an proseso.
