TACLOBAN CITY – Patay an duha nga sundalo ngan duha nga miyembro han rebelde nga grupo ha nahitabo nga engkwentro ha butnga han mga militar ngan New People’s Army (NPA) ha Brgy. Olera Calbayog City ha Samar.
Ginkilala an mga sundalo nga naawatan hin kinabuhi nga hira 2nd Lt. Geroe Jade Nicor ngan team leader nga hi Cpl. Joelito Canico samtang nagpapabilin naman nga waray pa pangilal-an an duha nga rebelde nga namatay ha mao nga engkwentro.
Sumala kan Maj. Bard Caesar Mazo OIC han Division Public Affair Office han 8th Infantry Division, humagos ha sakob hin haros duha kaoras an mao nga engkwentro ha butnga han tropa han gobyerno ngan rebelde nga grupo nga nagresulta gihapon han usa pa nga samaran nga sundalo nga hi Cpl. Eric Portalio.
Narekober ha insidente an duha nga M14 rifles high powered firearms nga gintatag-iyahan han duha nga rebelde nga namatay.
Una nga gintuuhan han mga militar nga private armed group an ira nakaengkwentro pero nakumpirma nga mga NPA an mga ini nga gintatagmanguluhan han ira lider nga hi Salvador Nordan alyas Ka Badok.
Nahibaruan gihapon nga naiha na nga nagdudumara hin extortion activities an mao nga rebelde nga grupo ha interior nga barangay han Olera ha Calbayog.
Ha pagkayana in padayon an ginbubuhat nga hot pursuit operation han mga militar kasumpay han mao nga engkwentro.
