Ginparayaw ni Eastern Samar State University (ESSU) President Dr. Andres Pagatpatan Jr. an bag-o nga topnotcher han Fisheries Professional Licensure Examination (FPLE) nga pangilal-an han maupay ngan dekalidad nga pagtutdo nga iginhahatag han ESSU ha mga estudyante.
Sumala kan Pagatpatan, dako an papel han programa ha pag-edukar ngan pag-andam hin mga propesyonal nga magpoprotehir, magbabantay ngan maataman han marine resources han nasud. Importante ini tungod kay an kadagatan amo an usa han nangunguna nga surok han pagkaon han katawhan, sanglit kinahanglan an mga eksperto nga may igo nga hibaro ha pagdumara ngan pagpreserbar hini.
Dugang pa niya, usa han mga rason kon kay ano nga gin-offer an Bachelor of Science in Fisheries ha ESSU mahitungod nga an geographical location han Eastern Samar in napapalibutan han Leyte Gulf ngan Pacific Ocean. Sumala ha iya, tikang hini nga katubigan an magkadurudilain nga marine resources, pareho han mga isda nga ginkukunsumo diri la ha Eastern Samar kundi pati ha iba nga mga lugar pareho han Manila ngan Cebu.
Ginpabug-atan ni Pagatpatan nga kinahanglanon an mga naggradwar hini nga kurso tungod kay dako an ira maibubulig ha pagprotehir han kadagatan ngan pagsiguro nga magpapadayon an suplay han pagkaon tikang ha kadagatan.
Ha pagkayana, may-ada 24 nga bag-o nga nakapasar ha Fisheries Licensure Examination tikang ha ESSU, ngan usa ha ira an nakasulod ha Top 10. Naglalaum hi Pagatpatan nga magigin inspirasyon an nasabi nga kalampusan ha mga estudyante nga karuyag kumuha han kurso ha tidaron nga mga panahon.
