Ginpahilawig han Eastern Visayas State University (EVSU) an temporaryo nga pagtugot ha mga estudyante ngan empleyado nga diri magsul-ot hin school uniform tungod han duro nga kapaso nga naieksperyensyahan.
Sumala kan Jenette Ruedas, Information Officer han EVSU, nagpagawas an administrasyon hin memorandum dida han naglabay nga mga adlaw an agud pahilawigon an temporaryo nga suspensyon han pagsul-ot han uniporme han mga estudyante ngan empleyado han unibersidad.
Dida han orihinal nga memorandum, tubtob la unta Oktubre 2, 2026, an pagtugot nga diri anay magsul-ot hin uniform. Pero mahitungod han kapaso ngan agud masiguro an komportable nga pag-eskwela ngan pagtrabaho han mga estudyante, faculty, ngan iba pa nga mga empleyado, nagdesisyon an administrasyon nga pahilawigon an nasabi nga polisiya.
Bisan kon gintutugotan na an mga estudyante nga diri anay magsul-ot hin uniporme, ginpahimatngonan hira nga magsul-ot hin bado nga desente, pormal, ngan angay ha sulod han eskwelahan. Diri naman gintutugotan an pagsul-ot hin duro kahalipot nga mga palda ngan shorts.
Samtang, ginpahinumdoman liwat han unibersidad an ngatanan nga estudyante nga istrikto nga kinahanglan magsul-ot han ira school ID ha pagsulod pa la han kampus ngan samtang aada ha sulod han unibersidad.
