Narekober han 8th Infantry Division Philippine Army an usa nga M1 Carbine nga pusil ngan duha nga magasin nga may sulod nga mga bala mahuman han lima ka minuto nga engkwentro ha butnga han mga sundalo ngan mga nabibilin nga mga miyembro han Communist Terrorist Group (CTG) ha Barangay Pupontong, Las Navas, Northern Samar.
Sumala kan LTCOL. Joseph Sabas, Chief han Division Public Affairs Office han 8th Infantry Division (8ID) Philippine Army, nahitabo an engkwentro kahuman magreport an usa nga sibilyan ha mga kasundaluhan mahitungod han presensya han usa nga armado nga grupo ha lugar kun diin nagresponde dayun an mga kasundaluhan, nga nagresulta ha engkwentro ngan pagkarekober han mga armas ngan bala nga nabayaan han grupo.
Dugang pa ni Sabas, posible nga may mga nasamaran ha bahin han armado nga grupo, ngan umiskapo kahuman han engkwentro.
Ginklaro liwat ni Sabas nga waray na barangay o lugar ha Eastern Visayas nga may impluwensya han CTG, ngan bisan pa han ira paniguro nga makabalik ha mga dati nga lugar nga ira naimpluwensyahan, diri na ini basta-basta gintutugotan han mga komunidad. Dugang pa hini, an mga residente na mismo an nagrereport ha mga kasundaluhan kun may nakikita hira nga presensya han armado nga grupo ha ira lugar.
Sumala kan Sabas, usa ini nga positibo nga pag-uswag ha kampanya kontra-insurgency tungod kay aktibo na nga nakikipagsumpayan an mga sibilyan ha mga awtoridad.
