![](https://img.bomboradyo.com/tacloban/2019/08/68420730_392216061648160_168449570831859712_n-1.jpg)
TACLOBAN CITY – Duha nga magkasunod nga dako nga sunog an nahipatik ha bungto han Caibiran, Biliran kagab-e.
Sumala kan FO1 Jovet Ballescas han Bureau of Fire Protection (BFP- Biliran), nga una anay nga nahipatik an sunog banda alas 6 han gab-e nga kun diin usa nga Industrial Copra dryer an nasunog ha parte han Barangay Uson, Caibiran.
Banda 7:50 naman han gab-e in nasundan naman hin sunog ha parte han Sitio Puro, Palenque nga kun diin maabot ha tulo nga mga panimalay an naugbaw.
Sumala pa ka kan Ballescas, nga padayun pa an ira ginbubuhat nga imbestigasyon ha kun ano an naging rasun o tinikangan han mao nga sunog.
Ha pakighimangraw naman han Bombo newsteam ha pira nga mga naguukoy harani han mao nga lugar, ginsisiring nga an napabay-an nga kandila nga dumukot ha biray an hinungdan han sunog ha Barangay Palenque.
Pira man gud nga mga residente in naka kandila la or naka lamparilya tungod han nahihitabo nga pagkaparong-parong han suga o pagkamay-ada hin black out ha mao nga bungto.
Subay ha report han BFP- Biliran, waray naman nahipatik nga casualties o samaran tikang han mao nga sunog.