TACLOBAN CITY – Dire Red Tide an rason han pagkamatay han mga misay nga naka-kaon han isda nga tamban nga igin labas ha pira nga parte hiton Samar.
Sumala kan Christine Gresola, Information Officer hiton Bureau of Fisheries and Aquatic Resources Regional Office VIII, negative an meat sample nga nakuha ha lugar nga gin aalegar gintikangan han iginlabas nga isda.
Basar hiton pakipagsumpayan han BFAR ha mga naapektaran nga LGUs, tikang daw ha Catbalogan City an isda, pero mayda gihapon nayakan nga tikang ine ha Calbayog City kun diin mayda naka-isa nga local red tide warning.
Nagklaro naman iton BFAR nga malabo nga red tide poisoning an rason han nasabi nga pagkamatay han pira nga kamisayan mahitungod nga negatibo an resulta han meat sample nga tikang ha nasabi nga lugar karuyag sidngon, habubo an ihap han Pyrodinium Bahamense sanglit dire ine maikokonsidera nga Red Tide.
Usa ha mga ginkikita nga anggulo han buhatan in kun presko ba an isda nga igin baligya, sanglit nag-abiso ine ha mga mamaralit nga panginanuon hin maupay an kalidad han isda nga ginpapalit agud dire mautro an parehas nga panhitabo.
Nag-aro naman na ha buhatan han BFAR hin usa ka-kilo nga sample han nasabi nga isda agud igpadara ha ira central office ngan ma-examine agud matudlok an rason han igin kamatay han mga kamisayan ha Samar.
