TACLOBAN CITY – Usa nga dati nga pulis an ginpusil patay han waray pa kakikilal-i nga mga suspek banda alas 7 han aga ha Barangay Mercedes, Catbalogan City, Samar.
![](https://img.bomboradyo.com/tacloban/2019/06/Policeman-shot.jpg)
Sumala kan PLTCOL Douglas Antonio Eloja, hepe han Catbalogan PNP nga kahuhuman pala igdurayhag han biktima nga hi anay PO3 Roy Pagunsan an iya asawa ha eskwelahan nga gintututduan hini han gin-atangan ngan ginpanmumusil ini han mga suspek nga sakay hin usa nga itom nga SUV han tibalik na ini ha ira panimalay.
Nag angkon ini hin igo hin bala ha ulo ngan ha lawas nga nagresulta han dayon hini nga kamatayon.
Narekober naman tikang ha crime scene an sobra 24 nga basyo hin bala tikang ha M-16 rifle.
Hi Pagunsan, 34 anyos in sumulod ha PNP dida han 1998 ngan na-assign ha Catbalogan City Police Station ngan iba pa nga unit han pulisya.
Pero han nakalabay nga Hunyo 2016 in nadismiss ini ha serbisyo mahuman daw nga madabi ha illegal nga droga ngan may kaso liwat ini nga grave misconduct.
Padayon naman nga gin-papanginano han mga kapulisan an mga CCTV nga posible makabulig ha pangilal-an han mga suspek ngan gin-aaram gihapon han mga ini an motibo han krimen.