TACLOBAN CITY- Ginmalatumat hiton Commission on Higher Education CHED Eastern Visayas, nga mayda hira ginsusunod nga aludayday kasumpay hiton pagkakansela han mga klase kun mayda kalamidad sugad hiton bagyo ngan linog.
Sumala kan Dr. Maximo Aljibe, Regional Director, CHED Region 8, nga tikang han igpagawas an Executive Order No. 66, An Prescribing Rules on the Cancellation or Suspension of Classes and Work in Government Offices due to Typhoons, Flooding, and other Weather Disturbances and Calamities, ine an panahon nga gintangal na an katungod han ira buhatan nga magdesisyon nga magsuspender han klase kun may kalamidad.
Mababaruan nga tikang han tuig 2012, an CHED an nagdedisisyon ha pagkakansela han mga klase ha unibersidad, pero han igpatuman an Executive No. 66 in nawara na an ira katungod ha pagdedisisyon.
Dugang pa ni Aljibe, otomatiko naman nga kanselado an klase ha tanan nga lebel kun ada na ha Signal No. 3 an kahimtang han panahon.
Ha pagkayana, ada na ha desisyon hiton LGUs ngan NDRRMC, ngan mga tagmangulo han eskwelahan an mga otorisado nga magkansela han klase.
Pananglitan naman magpatuman hin suspension of classes ha tanan nga lebel, gin-aabisuhan naman an tanan nga mga adviser han unibersidad, nga magkamayda hin make up classes ha mga estudyante, agud nga makalanat an mga ine ha ira leksyon.
Ha lain nga bahin, ginpaangbit naman hine nga kinahanglan ha kada eskwelahan in mayda mandatory earthquake drill ha mga estudyante, agud nga dire an mga ine malisang ha oras nga nagkakamayda hin linog, partikular na yana nga sigidas an natatabo nga linog.
Aminado nmaan ine nga mayda mga old buildings an mga universities ha rehiyon nga dire na angay gamiton matungod nga delikado na ine ha mga estudyante labi na yana nga sigidas iton linog.
Ine naman an ira ginpapanawagan matungod nga dire sugad hiton budget han DepEd an gin-aalutaga ha CHED,particular na ha mga paghingyad hiton universities.
