BORONGAN CITY – Naghatag hin rasyon nga tubig ha pira nga barangay ha Borongan City an Borongan City Fire Station.
Ine in mahitungod han nae-eksperyensyahan nga kakulangan hin suplay hin tubig ha nasabi nga syudad.
Sumala kan Borongan City Fire Station Fire Marshall, FInsp. Christina Tampil-Lelis, ada ha upat nga barangay han syudad han ira ginrarasyunan—amu an Maypangdan, Pepelitan, Hindang, ngan Libuton.
Nagtikang an pag-rasyun tikang pa dida han Agosto 5 han presente nga tuig.
Manunumduman nga ginpahayag ni Borongan City Mayor Jose Ivan Dayan Agda nga nakaka-eksperyensya hira kakulangan ngada ha kawaray suplay hin tubig mahitungod nga mayda problema an usa han ira mga pump han tubig.
Nagpatuman gihapon hin temporaryo nga face-to-face class suspension an state university han syudad mahitungod han nasabi nga problema.
Samtang, ginlalauman naman nga mararasyunan gihapon hin tubig an iba pa nga barangay han syudad nga nakaka-eksperyensya han kaparehas nga problema.
