ALMERIA, BILIRAN — Gin lunsar han lokal nga gobyerno han Almeria an P2 kada litro nga diskwento ha gasolina para ha mga parag-uma, paru-pangisda, transport groups, ngan mga empleyado han gobyerno mahuman nga pirmahan an usa nga Memorandum of Agreement (MOA) hadton Pebrero 19.
Gin pirmahan ni Mayor Maria B. Sale an kasabutan kaupod hira James Villamor ngan Fe Villamor han Panamao Fuel–Almeria Gasoline Station.
Sakop han programa an mga akreditado nga parag-uma ngan paru-pangisda, mga membro han ALTODA ngan ALHADA, teaching ngan non-teaching personnel han Department of Education–Almeria District, ngan mga empleyado han LGU-Almeria.
Subay ha munisipiladad, panuyo han inisyatiba nga maibanan an epekto han hitaas han presyo han lana ha kada-adlaw nga gastuson han mga benepisyaryo.
An programa in iginduso ni Sangguniang Bayan Member Francis Lloyd D. Labagala, chairperson han Committee on Public Utilities, pinaagi han Sangguniang Bayan Resolution No. 131.
Igin eksplikar ni Labagala nga limitado an kita ha bungto ngan haros umabot na ha gintudlok nga ceiling para ha personnel services an ira pondo. Mahitungod hini, dire kaya mag-alutaga hin direkta nga fuel subsidy an tinuig nga budget han LGU.
Ha kaluyo hini, ginmalatumat hini nga namiling hira hin alternatibo nga paagi agud mabaton an panawagan han transport sector nga naaro hin bulig.
Nakigsumpayan gihapon hira kan SB Member Noel Salloman, chairperson han Committee on Agriculture, agud mahilakip an mga parag-uma ngan paru-pangisda nga nakaka-eksperyensya han kaparehas nga ayat.
Nagpasalamat gihapon an alkalde ha pamilya Villamor ha pakikiusa ha programa, ngan gintagan-duon nga an public-private partnership in pamatuod han epektibo nga pagbinuligay han pribado ngan pampubliko nga sektor para ha kaupayan han kumunidad.
