NATIONAL NEWS– Ginmalatumat ni Commission on Elections (COMELEC) Chairman George Erwin Garcia nga mas papahuruhuguton nira an babantayan kasumpay hiton pagpalit hin mga botos yana nga nagtikang na an local campaign period.
Sumala kan COMELEC Chairman Garcia, ginlalauman nira nga mas madamo pa an sugad nga klase hiton report yana nga panahon hiton pangangampanya ha lokal nga lebel.
Dugang pa hine, ha pagkayana waray pa hira naitatala nga dabi an mga national candidates.
Pagsigurado niya nga an tanan nga reports nga maipapasa ha komisyon in dayon nira nga aaksyunan ngan iimbestigaran.
Ngan kun ginkikinahanglan nga madiskwalipika ngan makasuhan an kandidato nga napamatud-an, in andam hira nga igpatuman ine.
An Committee on Kontra-Bigay han poll body an nangunguna ha pagbabantay pag-abot ha vote-buying ngan selling yana nga panahon hiton pangangampanya.
