Nahipatik han Pilipinas an pinakadako nga kakulangan ha trade ha sulod han haros upat katuig dida han Abril mahuman malaksi nga humitaas an kantidad han mga gin aangkat nga produkto kumpara ha mga gin eexport. Usa ha mga pangunahon nga rason hini an paghitaas han presyo han lana nga durot han tensyon ngan kasamok ha Middle East.
Subay ha inisyal nga datos han Philippine Statistics Authority (PSA), umabot ha $5.97 bilyon an trade deficit han nasud dida han Abril. Ini an pinakahitaas nga lebel tikang dida han Agosto 2022, han nahipatik an $5.99 bilyon nga kakulangan.
Mas hitaas gihapon ini hin 50% kumpara ha $3.98 bilyon nga deficit dida han Abril han nakalabay nga tuig.
Tikang han Enero kutob Abril, humaluag an kabug-usan nga trade deficit han nasud ha $19.28 bilyon, mas hitaas kumpara ha $16.44 bilyon ha kaparehas nga panahon dida han nakalabay nga tuig.
Humitaas hin 22% an kantidad han mga gin aangkat nga produkto dida han Abril, umabot ha $13.17 bilyon tikang ha $10.77 bilyon dida han nakalabay nga tuig. Sugadman, ini na an pinakahamubo nga kantidad han imports tikang dida han Pebrero 2026.
Nagpapabilin nga an China an pinakadako nga ginkukuhaan han mga gin aagkat han Pilipinas, nga mayda kantidad nga $3.92 bilyon, o haros 30 porsiyento han kabug-usan nga imports dida han Abril.
Ha syahan nga upat kabulan han tuig, sumaka ha 14% an kabug-usan nga imports ha $49.22 bilyon tikang ha $43.36 bilyon dida han nakalabay nga tuig.
Samtang, sumaka naman ha 6% an exports han nasud dida han Abril, umabot ha $7.21 bilyon tikang ha $6.78 bilyon usa katuig an nakalabay. Sugadman, ini an pinakahamubo nga export value nga nahipatik yana nga tuig tikang dida han Enero.
An Estados Unidos an nanguna nga destinasyon han mga produkto nga gin-eexport han Pilipinas dida han Abril, nga mayda kantidad nga $1.3 bilyon o 18 porsiyento han kabug-usan nga exports.
Tikang han Enero kutob Abril, umabot ha $29.93 bilyon an exports han Pilipinas, mas hitaas hin 11% kumpara ha $26.93 bilyon dida han nakalabay nga tuig. Ini na gihapon an pinakahitaas nga export value nga nahipatik tikang han tikangan nga bantayan han PSA an datos dida han 1991.
Ha kaluyo hini, nagpapabilin nga optimistiko hi Trade Secretary Cristina Roque nga makakaghipatik an Pilipinas hin panibag-o nga rekord ha exports yana nga tuig, kasunod han makasaysayanon nga performance dida han nakalabay nga tuig.
Dida han nakalabay nga tuig, umabot ha $84.48 bilyon an kabug-usan nga merchandise exports han Pilipinas—an pinakahitaas nga lebel nga nahipatik tikang han tikangan an pagbantay han datos dida han 1991.
