Gin sigurado ni National Bureau of Investigation (NBI) Director Melvin Matibag nga andam an NBI nga arestuhon hi Senador Jinggoy Estrada bisan pa aada ini ha sulod han Senado.
Ginbuhat ni Matibag an pahayag mahuman magpagawas hin warrant of arrest an Sandiganbayan dida han Biyernes, Mayo 29, kontra kan Estrada mahitungod ha pagkakadabi hini ha maanomaliya nga flood control projects.
Manunumduman nga ginmalatumat han Office of the Ombudsman nga umabot ha P573 million kickbacks an nakarawat ni Estrada tikang ha nasabi nga proyekto.
Iginduon gihapon han Ombudsman nga “no bail” an iginpahamtang nga plunder case ha senador, rason agud dire ini dayun makagpyansa kasumpay han nasabi nga kaso.
Ha usa nga presscon, iginparehas pa ni Matibag an sitwasyon ha nagin pagprubar han mga otoridad nga igpatuman an arrest warrant kontra kan Senador Ronald dela Rosa dida han Mayo 11, 2026.
Dugang pa han NBI Chief, kun pagbabasaran an argumento nga mayda lokal nga warrant an akusado, klaro nga legal an pagbubuhaton nga pag-aresto kan Estrada bisan pa kun aada ini ha sulod han Senado.
Syahan na nga ginmalatumat han NBI nga mayda mga nauna nga kaso na kun diin naaresto an mga magbabalaod bisan nalingkod pa ha pwesto, kalakip na hira anay Senador Leila de Lima, Antonio Trillanes IV, an tumalikod na ha kadayunan nga hi Juan Ponce Enrile.
