Ginlunsar han Meta Platforms an mga bayad nga subscription plan para ha mga pangunahon nga aplikasyon hini nga Facebook, Instagram, ngan WhatsApp, kumo kaparte han pitad nga pag-iba-ibahon an ginkukuhaan hin kita han kumpanya labot ha advertising.
Gin anunyo ni Meta Head of Product Naomi Gleit ha usa nga video ha Instagram an pagpapagawas hin Facebook Plus, Instagram Plus, ngan WhatsApp Plus ha world market, ngan ginmalatumat nga mayda nakaandam nga kadugangan nga produkto para ha mga negosyo, content creators, ngan artificial intelligence services.
An pitad in kadungan han padayon nga panginano han mga mamumuhunan ha dako nga gastos han kumpanya ha artificial intelligence, kun diin ginbabana-bana nga maabot ha $125 billion ngada ha $145 billion an capital expenditure yana nga tuig. Mahuman an anunsyo, humitaas hin haros tulo kaporsyento an kantidad han stocs han Meta.
Subay ha mga report, maabot ha $3.99 kada bulan an Facebook Plus ngan Instagram Plus, samtang $2.99 kada bulan naman an WhatsApp Plus.
Maghahatag an mga subscription hin mas advanced nga features sugad han mas mahusay nga analytics, story rewatch statistics, mas haluag nga audience reach, ngan customization options para ha profile. An WhatsApp Plus in matutok ha personalization sugad han premium stickers, custom ringtones, ngan app themes.
Subay ha Meta, plano hini pag-usahon ha kabubwason an mga serbisyo hini ha ilarom han uusa nga brand nga tatawagon nga Meta One.
Syahan na nga naglunsar an kumpanya hin ad-free paid versions han Facebook ngan Instagram ha Europe dida han 2023 kumo pagsunod ha data privacy rules han European Union, kun diin gintagan an mga user hin pagpipilian ha butnga han libre nga ad-supported access ngan bayad nga subscription.
