Gin pahayag han beterana nga aktres nga hi Janice de Belen an suporta niya ha love life han iya mga anak, kaupod na hi Kaila Estrada, nga ginkokonekta ha aktor nga hi Daniel Padilla.
Ha guest appearance niya kan Boy Abunda dida han Biyernes, gin malatumat ni Janice nga an pinakaimportante para ha iya kumo nanay in an kalipayan han iya mga anak.
Dugang pa niya, waray hiya katungod nga manginlabot kun malipay an iya anak ha usa nga relasyon.
Igin paangbit gihapon ni Janice nga dire niya karuyag magin istrikto o kontrolado an mga desisyon han iya mga anak mahitungod nga naeksperyensya gihapon niya magin rebelde han iya kabataan.
Sugadman, ginmalatumat hini nga importante an pagtapod ha kapas han iya mga anak nga dig-unan an ira mga desisyon.
Manunumduman nga nagin irustoryahon an relasyon nira Kaila ngan Daniel mahuman nira makit-an nga magkaupod ha pira nga higayon tikang pa dida han nakalabay nga tuig.
Di pala maiha in nagpaangbit hi Kaila hin mga litrato tikang ha birthday celebration ni Daniel kaupod an usa nga malabo nga litrato nira nga duha kun diin makikita nga close an duha samtang nakapot an aktor ha hawak han aktres.
Ugsa ma-link kan Kaila, nagin maiha nga karelasyon ni Daniel hi Kathryn Bernardo. Gin kumpirma han anay mag-uyab an ira pagbulag dida han Nobyemre 2023 mahuman an 11 katuig nga relasyon.
