TACLOBAN CITY – Patay an usa katawo samtang samaran an walo nga iba pa mahuman an nahitabo nga bungguay hin motor ngan usa nga truck ha National Highway han Brgy. Danus, Leye, Leyte.
Ginkilala an namatay nga sakay han truck nga hi Nielson Villasin, ada ha sakto nga pangidaron ngan residente han Brgy. Marjen, Ormoc City.
Samtang, ginkilala naman an iba pa nga samaran nga mga sakay han truck nga hira Jojo Cabahug, Benjie Alao ngan Eucan Ibañez puros mga residente han mao nga barangay ha syudad han Ormoc.
Ginkilala naman an iba pa nga mga biktima, an driver han single nga motor nga hi Alvin Cañas ngan mga backriders hini nga hira Adelaida Marianito, Emilda Alfabete ngan Evangeline Calarion ngan mga residente han Brgy. Palarao, Leyte, Leyte.
Sumala kan Pol. Capt. Ryan De Lima, hepe han Leyte-Leyte MPS, biyahe tipakadto ha Ormoc City an truck nga may karga nga mga humay samtang biyahe naman tipauli ha Brgy. Palarao an mao nga motorsiklo.
Subay ha inisyal nga imbestigasyon, samtang ginbabaybay han duha nga behikulo an magkaluyo nga direksyon, in tigda nga nawarayan hin preno an truck ha tipalusok nga parte han karsada rason para mangadto ini ha linya han motor ngan magbungguay.
Dayon naman nga gindara ha ospital an mga biktima ngan ha pagkayana in padayon nga nagpapatambal.
